ಕುರಿಗಳು ಸಾಗುತಿವೆ
ಮರ್ಕ್ಯುರಿ ದೀಪದ ಬೆಳಕಲಿ
ಕಳೆದು ಹೋಗುತಿವೆ
ಲಕ್ಷ ಲಕ್ಷ......
ಸುತ್ತಮುತ್ತಲಿನ ಬಗ್ಗೆ ಅವಕೆ ಅಲಕ್ಷ
ಕೆಲಸ, ದುಡ್ಡು, ಮನೆ, ವೀಕೆಂಡಿನಲ್ಲಿ
ಸಿನೆಮಾ, ಶಾಪಿಂಗು
ಬೇಸರ ಕಳೆಯಲು ಬಾರು
ಇವೆ ಕುರಿಗಳ ಕಾರುಬಾರು
ತಲೆಯೆತ್ತಿ ನೋಡಿ ಒಮ್ಮೆ
ಸಿನೆಮಾ ಪೋಸ್ಟರನಲ್ಲ
ಹೊಕ್ಕಳು ತೋರಿಸುತ್ತಿರುವ ಹುಡುಗಿಯ
ಜಾಹಿರಾತನಲ್ಲ
ಆರಿಹೋದ ಮರ್ಕ್ಯುರಿ ದೀಪವನಲ್ಲ
ಆಗಸದಲಿ ಇಣುಕುವ ಮುದ್ದಿನ
ಚಂದಿರನನು
ನಿಮ್ಮೊಡನೆ ಕರೆದಲ್ಲಿ ಬರುವ
ತಂಪಿನ ಹೂಮಳೆ ಸುರಿಸುವ
ನನ್ನ ಮುದ್ದಿನ ಬೇಟೆಗಾರನನು
ಕರೆಂಟ್ ಕೈಕೊಟ್ಟ ಕ್ಷಣದಲ್ಲಾದರೂ
ಹೊರಬಂದು ನೋಡಿ ಅವನನು
ಪಕ್ಷಗಳಿಗೊಮ್ಮೆ ಮರೆಯಾದರೂ
ಮನದಂಗಳದಲಿ ಮೂಡುವನು
ಒಮ್ಮೆ ನೋಡಿ ಚಂದಿರನನು